Bertaratutako guztiei ongietorria emanez ekingo diogu, eta gogoratuz gaur egutegian markatutako data garrantzitsu batetik oso gertu gaudela: Urriaren 16a, Elikaduraren Munduko Eguna. Jardunaldi honek gogoeta sakona egitera gonbidatzen gaitu: nola elikatzen garen, zer eredu kontsumitzen dugun eta zer etorkizun eraikitzen ari garen hurrengo belaunaldientzat.
Etorkizuneko eredu hori ulertzeko, ezinbestekoa da gure plateretatik haratago begiratzea eta elikadura-subiranotasunaren kontzeptua onartzea, Via Campesinak definitzen duen bezala. Elikadura-subiranotasuna herriek zer jaten dugun eta gure elikagaiak nola ekoizten diren erabakitzeko duten eskubidea da, elikadura osasuntsu, elikagarri eta gure lurraren aldeko apustua eginez, eta komunitateek beren janaria autonomia osoz ekoizteko bitartekoak bermatuz.
Definizio hori eremu praktiko eta lokalera eramatea da, hain zuzen ere, Berango-Merana Eskolako familiok hainbeste urte daramatzagun borroka. Gure guraso-elkartetik argi daukagu: eskola-jantokia ez da katering-zerbitzu hutsa, hezkuntza-espazio osasungarri, hurbil eta komunitarioa baizik.
Hezkuntza Sailak proiektu hau behin baino gehiagotan onartu duen arren, beti izan du atzerapen aitzakitua. Azken aldia 2021ean izan zen, sukaldaritza-proiektua IPI aurreproiektuak baldintzatu zuenean.
Egia esan, 2026an, gure seme-alabei eskubidez eta osasunez dagokiena eskatzen jarraitzen dugu. Eskola-elikadura janariak zerbitzatzetik askoz harago doala aldarrikatzen dugu: elikagaien jatorriarekin konektatzeko, haurtzarotik ohitura iraunkorrak sustatzeko eta hurbileko eta kalitatezko produktuen aldeko apustua egiteko hezkuntza-aukera bat da.
Eskola-elikadura osasungarria, ezinbestean, sukalde propio batetik hasten delako.
Ahalegin hori guztia, hezkuntza-komunitatearen sentipen partekatu hori eta aldarrikapen irmo hori laburbilduta geratzen dira gaur aurkeztuko dugun proiektuan. Kulturaren eta musikaren bidez gure sukaldea eta hurbileko elikagaiak izateko dugun eskubidea defendatu nahi dugu.
«Geure bazkarie» bideokliparen proiekzio ofizialari ekingo diogu. Josu Santamariak konposaketan, Aratz Díezek Euridia estudioan, Naroa Gaintzaren ahotsean eta Julen Zubieteren ikus-entzunezko ekoizpenean sortu dute, gure eskolako familia guztiekin lankidetza estuan.
Gozatzea espero dugu!
Proiektu hau Elikadura Iraunkorraren Astearen erdigunea da: eskola-jantoki propioa eta elikadura osasuntsu, hurbil eta iraunkorra aldarrikatzeko. Asteari buruzko informazio osoa hemen.